O Claustro aproba unha declaración en defensa da universidade pública

A Coruña, 15 de maio de 2012.- O Claustro da Universidade da Coruña acaba de aprobar por asentimento de todos os presentes unha declaración en defensa da universidade pública presentada polo reitor, Xosé Luís Armesto, logo de a consensuar previamente e que transcribimos integramente:

“O Claustro da Universidade da Coruña reunido en sesión ordinaria o 15 de maio de 2012, ante as medidas contempladas no Real Decreto-lei 14/2012 de 20 de abril, acordou aprobar a seguinte declaración:
1. A educación universal, pública e de calidade é un dereito fundamental, base da formación de persoas libres e críticas e dunha cidadanía responsable. A Universidade pública e un instrumento fundamental de cohesión social e económica, e vén demostrando desde hai máis de trinta anos a súa validez como garante da igualdade de oportunidades no acceso ao ensino superior.
2. Manifestamos a nosa oposición á suba do custo das matrículas universitarias. Ratificamos o acordo do Claustro de 2008 no que pedimos a conxelación dos prezos de matrícula e o incremento das bolsas baixo o principio de igualdade e de xustiza social, ao considerar que as razóns esgrimidas naquel momento están plenamente vixentes no momento actual.
3. Pedimos que se retiren os mecanismos propostos para revisar a dedicación docente, por seren ineficaces e constituíren unha ameaza para a calidade da formación e da investigación.
4. Reclamamos o financiamento público necesario para que a UDC poida converxer coas universidades do entorno europeo coas que se nos compara. O investimento en educación e I+D+i é unha condición necesaria para superar con éxito a crise global actual.
5. Pedimos a participación da comunidade universitaria en particular e da sociedade en xeral, na defensa do dereito fundamental á educación e á mellora do sistema universitario como servizo público esencial garante da democracia e da cohesión social.
6. Comprometémonos a introducir as medidas técnicas, formativas e organizativas necesarias para acadar un mellor rendemento social dos fondos públicos investidos na universidade”.

Ademais deste punto, a orde do día incluía a presentación da Memoria do Reitor de 2011. Os datos máis significativos do ano pasado veñen marcados polo impacto directo ou indirecto da crise económica e polas consecuencias das políticas adoptadas polo Goberno central e pola Xunta de Galicia. Diminúe con claridade o montante dos convenios e contratos con entidades públicas e privadas, e a caída é aínda maior na captación de recursos para proxectos competitivos.
En contra, algúns indicadores son altamente positivos, como a obtención de patentes e os rexistros de sóftware aceptados.
Os datos de matrícula teñen unha tónica de estabilidade, situando á Universidade da Coruña no grupo de 17 universidades españolas de tamaño medio, con entre 20.000 e 30.000 estudantes a nivel de grao.
O reitor salientou na presentación da memoria que o exercicio pasado se cumpriu o compromiso formal de manter a masa salarial total de profesorado e de persoal de administración e servizos. Destacou, ademais, o incremento nun 3% no número de profesores que acadaron o grao de doutor. Finalmente, Armesto destacou como fito de 2011 a apertura de Normal, o espazo de intervención cultural no campus de Riazor, e a presenza da Universidade da Coruña nas redes sociais: Facebook e Twitter.
Na sesión de Claustro desta mañá presentou o seu informe de xestión o Valedor Universitario, Enrique Martínez Ansemil. No curso 2010/2011 tivo 36 consultas e 43 queixas, dos colectivos de estudantes, de profesores e do persoal de administración e servizos. O Valedor explicou que algunhas das consultas son de carácter administrativo e que non todas as queixas implican mala atención do servizo. Exames e criterios de avaliación son os motivos de protesta maioritarios. O Valedor indicou que a un 62% se lles dá unha solución nun prazo de tempo entre un e sete días.
Tanto a presentación da Memoria do Reitor, como do Informe do Valedor Universitario, como mesmo a Declaración do Claustro suscitaron un intenso debate entre os asistentes, nalgúns casos pedindo maiores explicacións sobre puntos concretos, e noutros, como unha forma de reflexionar en voz alta sobre o modelo de universidade que se pretende conseguir.
O reitor emprazou aos presentes a continuar o debate de cara á elaboración dun novo Plano Estratéxico da Universidade da Coruña que terá que actualizarse o vindeiro ano. Finalmente, lembrou o papel que cumpriu a Universidade da Coruña no seu contorno inmediato, na área da Coruña e Ferrol, nos máis de vinte anos desde a súa creación ao considerar que “tivo un efecto moi importante no acceso á educación pública superior de moita xente que doutra forma non podería por cuestións económicas”.

Inauguración de exposición no Concello de Arteixo

A Coruña, 15 de maio de 2012.- O Centro Tecnolóxico de Arteixo acollerá o mércores, 16 de maio, ás 20.00 horas, a inauguración da exposición titulada “Arteixo Patrimonio Románico”, comisariada polo catedrático de Composición Arquitectónica da Escola Técnica Superior de Arquitectura da Universidade da Coruña José Ramón Soraluce Blond.
Esta mostra está organizada por iniciativa do Concello de Arteixo e coa colaboración da Deputación Provincial da Coruña e o Arcebispado de Santiago de Compostela, con motivo da conmemoración este ano do 850 aniversario das edificacións das igrexas románicas de Santo Estevo de Morás e San Tirso de Oseiro, e co obxectivo de poñer en valor estas construcións.

O Claustro da Universidade da Coruña reúnese mañá

A Coruña, 14 de maio de 2012.- O Claustro da Universidade da Coruña reunirase mañá en sesión ordinaria, ás 9:30 horas en primeira convocatoria e media hora máis tarde en segunda, no Paraninfo da Reitoría.
A orde do día inclúe a presentación da memoria do reitor do ano 2011 e o informe de xestión do Valedor Universitario. Así mesmo, o Claustro tratará unha declaración institucional en apoio da universidade pública.
 

O reitor entrevistouse co decano da Facultade de Economía e Empresa

A Coruña, 11 de maio de 2012.- O reitor, Xosé Luís Armesto, e o vicerreitor de Profesorado e Planificación Docente, Gustavo Rego, achegáronse esta mañá á Facultade de Economía e Empresa en que mantivo unha reunión de traballo co decano, Anxo Calvo, e parte do seu equipo. O obxectivo do encontro era coñecer a problemática deste centro que aglutina a un elevado número de alumnos.
O decano trasladoulle ao reitor a preocupación existente na facultade ante a publicación do Real Decreto de 20 de abril que afecta á modificación das cargas docentes e á investigación realizada nas universidades. Anxo Calvo comentou, ademais, o esforzo que se está a facer por parte do profesorado con respecto aos proxectos de fin de grao derivados da implantación do Espazo Europeo de Educación Superior. O decano valorou moi positivamente os cambios habidos na universidade española nos últimos vinte anos e a súa constante adaptación á realidade do contorno e que, asegurou, melloraron considerablemente a formación dos estudantes ata facela moito máis práctica e dinámica. Precisamente, as prácticas en empresas do alumnado foi outro dos temas que se trataron na reunión desta mañá.

O reitor visitou a Facultade de Fisioterapia

A Coruña, 11 de maio de 2012.-O reitor da Universidade da Coruña, Xosé Luís Armesto, visitou esta mañá a Facultade de Fisioterapia, que vén de cambiar de denominación pasando de ser Escola Universitaria de Fisioterapia á Facultade de Fisioterapia, un nome máis acaído á realidade formativa do centro.
O reitor acudiu co vicerreitor de Títulos, Calidade e Novas Tecnoloxías, Julio Abalde, e foi recibido polo equipo decanal que lidera Ramón Fernández Cervantes. O decano amosou ao reitor a transformación das aulas que sufriron modificacións para adaptarse ao Espazo Europeo de Educación Superior, que require unha docencia a alumnos de grupos máis reducidos, así como outros espazos da facultade como laboratorios ou a biblioteca. Con todo, a adaptación aos novos planos europeos foi máis doada nesta facultade que noutros centros, posto que polas súas características académicas xa se viñan impartindo clases en grupos reducidos. O decano comentoulle ao reitor os proxectos nos que se están a traballar tanto desde o decanato como desde o departamento para potenciar a investigación e a lectura de teses doutorais e as sinerxias con outras universidades. Así mesmo, lembrou os dous mestrados que se imparten nesta facultade con visión estratéxica dentro do sistema universitario galego, Xestión e Investigación da Discapacidade e a Dependencia e Intervención na Discapacidade e na Dependencia.
Así mesmo e a suxestión dos alumnos, plantexáronse outros temas de interese como a instalación dunha maior potencia eléctrica para poder cablear ao crecente número de equipos informáticos ou a instalación de alimentos sans nas máquinas de vénding da facultade.
 

Proxección da película “Arrugas” e conferencia do seu coprodutor e coguionista Ángel de la Cruz na Facultade de Ciencias da Comunicación

A Coruña, 11 de maio de 2012.- O luns, 14 de maio, o salón de actos da Facultade de Ciencias da Comunicación acollerá a proxección da película “Arrugas”, que recibiu dous premios Goya 2012: mellor longametraxe de animación e mellor guión adaptado.
Xa o mércores, 16 de maio ás 13:00 horas terá lugar a conferencia con Ángel de la Cruz, coguionista e coproductor desta película, que acadou tamén cinco premios Mestre Mateo 2012: mellor longametraxe de animación, mellor guión, mellor dirección artística, mellor música orixinal e mellor son. Ademais ten o premio á mellor produción europea no Cartoon Movie 2012; e premio do público á mellor longametraxe de animación no Festival Anima 2012.

Deporte e literatura, tema da charla do Premio Blanco Amor de 2010 na Facultade do Deporte

A Coruña, 11 de maio de 2012.- A Facultade de Ciencias do Deporte e da Educación Física súmase á conmemoración do Día das Letras Galegas cunha conferencia do escritor e licenciado pola facultade Iván García Campos, gañador do Premio Blanco Amor no ano 2010.
O seu relatorio, que terá lugar o luns, 14 de maio, ás 13.00 horas no salón de actos do centro, leva por título "Causas deportivas nos textos literarios (e viceversa). Cultura, Educación Física e o medio”.

O experto internacional en seguridade virtual Ross Anderson
ofrecerá unha conferencia na Facultade de Informática

A Coruña, 11 de maio de 2012.- A Facultade de Informática da UDC acollerá o mércores, 16 de maio, ás 10.00 horas, a conferencia do experto internacional en seguridade informática, profesor Ross Anderson, da Universidade de Cambridge, que levará por título "Cryptology and security – where is the research frontier?". Ross Anderson ten participado en varios desenvolvementos criptográficos como as primitivas Bear, Lion e Tiger ou o código de cifrado de bloques Serpent. As súas investigacións baséanse na relación da economía e seguridade, e é tamén un defensor das liberdades no mundo dixital.

Esta conferencia encádrase no ciclo "IV Obradoiro de Criptografía, Privacidade e Seguridade" que organiza a Asociación Universitaria GPUL, e no que participarán expertos locais en administración de sistemas informáticos e programación de lseguros. O ciclo desenvolverase entre os días 14 e 16 de Maio na propia Facultade de Informática. As xornadas inauguraranse o luns 14 ás 16.00 horas coa intervención de Jesús Pérez, de Quobis, e Carlos Pérez, de Igalia, que falarán, entre outros aspectos, da xestión de incidentes en seguridade. A continuación intervirán Vreixo Formoso e Víctor Prieto, que exporán cuestións sobre a seguridade das contrasinais. Xa na xornada do martes 15, Daniel Murías, da Facultade de Informática, falará sobre o mecanismo Port Knocking e a continuación ofrecerá un obradoiro Alejo Pacín, do Grupo de Programadores e Usuarios de Linux. O mércores clausuraranse as xornadas, tras a intervención do profesor Ross Anderson, coa conferencia de José Mato, da Facultade de Informática da UDC, sobre seguridade nas aplicacións web.

A Universidade da Coruña celebra unha Semana das Letras en homenaxe a Valentín Paz Andrade

A Coruña, 11 de maio de 2012.- A Universidade da Coruña sumarase á conmemoración do Día das Letras Galegas na figura de Valentín Paz Andrade con diversas actividades e encontros, que comezarán a partir do luns 14 de maio na Facultade de Economía e Empresa, e que ten como obxectivo poñer en valor a figura e o legado de Paz Andrade.

Este encontro comezará o luns 14 ás 13.00 horas coa conferencia no salón de graos do catedrático de Economía Aplicada da Universidade da Coruña Fernando González Laxe, que disertará sobre “A gobernanza dos océanos e as tendencias na xestión pesqueira”. Xa o martes, ás 13.00 horas, o salón de graos acollerá a conferencia da doutora en Filoloxía Galega e responsable da Coordinadora Galega de Equipos de Normalización e Dinamización Lingüística Valentina Formoso, titulada “Empresa galega no mundo globalizado e plurilingüe”.
A xornada central terá lugar o mércores, 16 de maio. Comezará ás 10.00 horas cunha lectura aberta e pública baixo o título “Voces nas Letras”, na que está previsto que o reitor, Xosé Luís Armesto, faga a súa lectura ás 11:30 horas. Ás 12.00 horas terá lugar a inauguración da Aula Valentín Paz Andrade e a entrega dos premios de microrrelatos "Mar e lingua". A continuación, ás 13.00 horas, celebrarase a conferencia central desta semana conmemorativa, a cargo do filólogo e catedrático de Filoloxía Románica da Universidade de Santiago de Compostela Francisco Fernández Rei, titulada "Por unha hora en popa, un ano en bolina. Notas sobre a cultura e patrimonio léxico da beiramar galega". Xa pola tarde retomarase a sesión de lectura “Voces nas Letras” e ás 19.00 horas no salón de graos os actos clausuraranse cun concerto de Xoán Curiel, que presentará o seu novo disco Magnético zen.

A inmigración chinesa na Coruña, a debate hoxe na Facultade de Socioloxía

A Coruña, 11 de maio de 2012.- A Facultade de Socioloxía acollerá hoxe venres, 11 de maio, ás 14.00 horas, o seminario titulado “A inmigración chinesa na Coruña: Visibilidade Vs Invisibilidade. Realidades e Estereotipos”. Esta sesión correrá a cargo de Area Hermo Fernández, socióloga especializada no estudo das migracións desde a perspectiva antropolóxica. Esta actividade enmárcase na serie de Seminarios do Equipo de Socioloxía das Migracións Internacionais (SESOMI), da Universidade da Coruña.

Area Hermo ten participado en diferentes proxectos de I+D+i en diferentes áreas, desde cultura e prácticas políticas ata redes migratorias e codesenvolvemento. Actualmente atópase preparando a súa tese doutoral na Universidade da Coruña, centrada nas “Imaxes de China en España: a cultura asiática”. En palabras da propia relatora, as investigacións sobre a inmigración chinesa seguen a ser “unha materia pendente, especialmente no seu enfoque cultural”. Baixo o formato aberto que caracteriza aos SESOMI, tentarase contribuír mediante o debate nesta interesante investigación en curso.

O próximo seminario dentro deste ciclo terá lugar o venres 18 de maio, no que se contará cun importante convidado: Ramón Grosfoguel do Departamento de Estudos Étnicos da Universidade de Berkeley, que tratará o tema “Teorías da migración internacional e a xeopolítica do coñecemento”.

A UDC organiza un congreso internacional de primeira liña sobre ciencias do solo que se celebrará no novo Museo Nacional de Ciencia e Tecnoloxía

A Coruña, 10 de maio de 2012.- A Universidade da Coruña organiza, xunto coa Universidade Politécnica de Madrid, o Congreso PEDOFRACT VII, que se celebrará no Museo Nacional de Ciencia e Tecnoloxía, ubicado na Coruña, entre os días 14 e 17 de maio.
A organización por parte da UDC corre a cargo do Grupo de Investigación PEDOFRACT: Fractais e aplicación en Ciencias do Solo e Medioambientais, que realiza unha investigación multidisciplinar de amplo espectro, co obxectivo de abordar un desenvolvemento teórico de ferramentas matemáticas capaces de describir estruturas e procesos de medios con alto nivel de complexidade e heteroxeneidade, e por outro, a aplicación de ditos desenvolvementos á análise e modelización da estrutura do solo e dos procesos que teñen lugar nel. Este congreso é de carácter internacional e conta coa participación de científicos de gran relevancia no campo das ciencias do solo, procedentes de institucións de España, Estados Unidos, China, Francia, Alemaña ou Brasil. Entre eles destacan o professor Rudolf Hilfer, da Universidade de Stuttgart, Alemaña; o professor Alexander V. Neimark, da Rutgers University de Estados Unidos; o professor Shlomo Neuman da Universidade de Arizona, en Estados Unidos, ou o profesor Edmund Perfect, da Universidade de Tennessee, en Estados Unidos.
Máis información: http://www.udc.es/congresos/pedofractvii/ http://www.udc.es/congresos/pedofractvii/scientific.htm
 

A Facultade de Deporte acolle mañá unha mesa redonda sobre o golf

A Coruña, 10 de maio de 2012.- A Facultade de Ciencias da Educación Física e do Deporte acollerá mañá venres, 11 de maio, ás 10.30 horas, a mesa redonda titulada "Os clubes de Golf, as titulacións e a promoción deportiva, novos retos".
Este acto contará coa participación de Daniel Fernández, presidente da Federación Galega de Golf; Juan Cuevas, presidente do Real Aeroclub de Santiago; Luis Sierra, presidente do Club de Golf de Narón, e Gerardo Mosquera, xerente do Club de Golf de Miño, así como Francisco Costoya, director do IES de Miño, centro escolar onde en colaboración con alumnos e alumnas da Universidade da Coruña e o Club de Golf de Miño estase a desenvolver unha novidosa experiencia de achegar o golf ás escolas. A asistencia é libre para todos os alumnos e interesados en xeral.

O reitor reuniuse esta mañá co equipo decanal da Facultade de Dereito

A Coruña, 9 de maio de 2012.- O reitor da Universidade da Coruña, Xosé Luís Armesto, visitou esta mañá a Facultade de Dereito para reunirse co decano, Eloy Gayán, e o seu equipo, xunto co vicerreitor de Títulos, Calidade e Novas Tecnoloxías.
O decano trasladoulle ao reitor a preocupación existente na facultade ante as últimas medidas tomadas polo Goberno central e que afectan a todas as universidades, e tratáronse temas referentes ao centro, como obras pendentes de rematar ou cuestións de xestión administrativa. Finalmente, falouse sobre a Lei de Acceso á Avogacía e como afectará ao centro a posta en marcha dos novos mestrados en Avogacía e Procuradoría que se implantarán o vindeiro curso.
O Mestrado en Avogacía será necesario para os alumnos que queiran exercer a profesión de avogados e consistirá nunha parte teórica e unha parte práctica. Ao seu remate, os estudantes terán que superar un exame que se poñerá a nivel de todo o Estado.
Segundo a última modificación da Lei de Acceso ás profesións de Avogado e Procuradoría, establécense catro excepcións de alumnos que non teñen que cursar este mestrado para exercer a súa profesión:
-En primeiro lugar, todos aqueles matriculados antes de que se aprobase a lei en outubro de 2006 non terán que realizar o mestrado se no prazo de dous anos, unha vez finalizada a carreira, proceden a colexiarse.
-En segundo lugar, todos aqueles que se matricularon na Licenciatura en Dereito despois de 2006 quedarán exentos da parte teórica do mestrado. Só será necesario que cumpran coa parte práctica.
-O terceiro apartado é para aqueles estudantes que solicitaron a homologación dun título estranxeiro antes de que entrase en vigor a lei. Quedarán tamén exentos sempre e cando se colexien nun prazo máximo de dous anos desde que obteñan a homologación.
-Finalmente, tampouco se esixirá o título profesional aos estudantes que obtiveron a súa licenciatura antes da lei de 2006 pero terán que colexiarse tamén nun prazo de dous anos.

Conferencia sobre rehabilitación ecoeficiente
na Escola Universitaria de Arquitectura Técnica

A Coruña, 9 de maio de 2012.- A Aula Magna da Escola Universitaria de Arquitectura Técnica acollerá mañá xoves, 10 de maio, ás 12.30 horas, a conferencia de José Contreras Vázquez, enxeñeiro de Roca Sanitario, e Antonio Rico Campos, delegado de Roca Sanitario Galicia, que leva por título “Patoloxías a considerar en aparatos e instalación e cuartos de baño na rehabilitación ecoeficiente”.

O reitor reuniuse co equipo directivo da Escola de Arquitectura Técnica

A Coruña, 9 de maio de 2012.- O reitor, Xosé Luís Armesto, visitou onte a Escola Universitaria de Arquitectura Técnica, xunto co vicerreitor de Títulos, Calidade e Novas Tecnoloxías, Julio Abalde, para entrevistarse co seu director, Pedro Nogueira, e o seu equipo.
Na reunión tratáronse temas específicos desta escola da Universidade da Coruña como os exitosos ciclos de conferencias sectoriais con empresas vinculadas á construción como Roca ou BASF Construction Chemicals España. De feito, esta última vén de facer entrega por cuarta ocasión dos Premios Edificación aos mellores proxectos dos alumnos realizados coa tecnoloxía sustentable desta firma aplicada á construción.
O director explicoulle ao reitor que, neste momento, se estaba traballando na posibilidade de ofrecer mestrados universitarios interuniversitarios, conxuntamente con universidades punteiras do resto de España. Ademais, o equipo directivo trasladoulle a Armesto a súa preocupación pola eliminación das barreiras arquirtectónicas nesta escola, unha das máis antigas da universidade, unha demanda que coincide coas prioridades estipuladas nos orzamentos da Universidade da Coruña para este ano.
A investigación no seo da escola foi outro dos temas que se falaron e como curiosidade comentouse que a primeira patente da UDC foi solicitada por un dos actuais subdirectores, Ramón Vázquez, sobrer mallas especiais en madera laminada.

Conferencia sobre enxeñaría industrial e naval na Escola
Universitaria Politécnica de Serantes

A Coruña, 8 de maio de 2012.- O salón de actos da Escola Universitaria Politécnica de Serantes, no Campus de Ferrol, acollerá mañá mércores, 9 de maio, ás 19:00 horas, a conferencia de Francisco de Bartolomé Guijosa, que foi profesor asociado da Universidade da Coruña e ex director de Enxeñaría do estaleiro Astano.
A conferencia, que se enmarca no Ciclo de Conferencias sobre Aspectos da Administración e Operación das Empresas, leva por título "O departamento de Enxeñaría en grandes proxectos industriais-navais"

Ana Iglesias tomou posesión como decana da Facultade de Ciencias da Educación

A Coruña, 7 de maio de 2012.- A profesora Ana Iglesias Galdo tomou posesión esta mañá como decana da Facultade de Ciencias da Educación, despois de ser elixida en Xunta de centro o pasado 17 de abril. O acto oficial de toma de posesión tivo lugar esta mañá na Reitoría ante a presenza do reitor, Xosé Luís Armesto, do novo equipo decanal que acompañará a Ana Iglesias no seu mandato, e do anterior decano, Narciso de Gabriel.
O reitor agradeceu a De Gabriel a súa dedicación xenerosa á fronte da Facultade nos últimos anos e felicitou á nova decana. Armesto lembrou a importancia de asumir este tipo de responsabilidades na institución, sobre todo, dixo, nun momento en que se fai máis necesaria a defensa do ensino público. O reitor subliñou a posta en valor da docencia como primeira misión da universidade coa responsabilidade de formar profesionais altamente cualificados e animou ao novo equipo decanal a seguir traballando nesa liña.

A Universidade da Coruña celebra os 25 anos Erasmus coa inauguración do punto de encontro de estudantes internacionais, FINDER

A Coruña, 7 de maio de 2012.- A Vicerreitoría de Relacións Internacionais e Cooperación da Universidade da Coruña está a preparar unha xornada especial coa que conmemorar os 25 anos de existencia do programa Erasmus, xunto con Europe-Direct da Deputación da Coruña. Parte das actividades serán o vindeiro mércores 9 de maio no salón de actos da Facultade de Economía e Empresa, no campus de Elviña.
A vicerreitora Natalia Álvarez Lata abrirá os actos ás 10:30 horas para dar paso a unha conferencia sobre as opcións de Erasmus que ofrece a Universidade da Coruña: Mundus, con fins de estudo ou de prácticas, ademais de outros programas internacionais de mobilidade. Intervirán o director da Oficina de Relacións Internacionais, Fernando Peña López, e a subdirectora da Universidade Sénior, Pilar Millor.
Ás 11:15h. haberá unha mesa redonda na que se falará sobre as oportunidades que teñen os alumnos estranxeiros na Universidade da Coruña, a cargo de Alberto García, presidente da Asociación de estudantes AEGEE; Miguel García Mosquera, responsable do departamento de RRHH Inditex; Luis Hervella, director da Oficina de Cooperación e Voluntariado da UDC, e Cristina Couto, técnica de Europe Direct, da Deputación da Coruña.
Ás 12, tomarán a palabra os protagonistas: os alumnos Erasmus. Intervirán:
Xosé Allegue. Arquitecto. Estudante Erasmus da ETSA na Ècole de Architecture de Lille (Francia) en 1990.
Emilio Rodríguez. Arquitecto. Profesor Asociado de Proxectos UDC. Erasmus en 1994.
Elena Sepiacci e Alessandro Conti. Estudantes Erasmus da Facultade de Dereito (Italia)
Nora Balint. Estudante Erasmus da Facultade de Economía e Empresa (Hungría)
Janis Regina dal Pont. Estudante dun programa de mobilidade internacional da Universidade do Estado de Santa Catarina.
Isabel Granullaque Dapena. Estudante da Universidade Sénior (Campus de Ferrol) do programa Grundtvig.
Ana López, Oficina de Relacións Internacionais da UDC. Erasmus STT en Finlandia.
Para rematar a parte de charlas, presentarase o concurso “Cóntanos a túa experiencia Erasmus”, que conta coa colaboración da Deputación da Coruña.
Os actos trasladaranse a partir das 13 horas ao Pavillón de Estudantes, no Campus de Elviña, onde se inaugurará o punto de encontro para os estudantes internacionais FINDER, que se acabará de montar coa colaboración de todos os presentes.
Finalmente, a actuación de Fran Pérez, NARF, pechará a festa dedicada a celebrar 25 anos de internacionalización dos estudantes universitarios en Europa.
 

Un alumno da Escola Politécnica Superior da UDC premiado
no certame Fototalentos da Fundación Banco Santander

A Coruña, 2 de maio de 2012.- O alumno da Escola Politécnica Superior, da Universidade da Coruña, Luis Suárez López, estudante de Enxeñaría Naval Oceánica, vén de gañar un accésit no premio Fototalentos’12, que convoca a Fundación Banco Santander para todos os membros da comunidade universitaria dos países da rede Universia, que abrangue España, Andorra e América latina. Neste certame poden participar desde profesores e investigadores ata alumnos e persoal docente investigador de todas as universidades.
A fotografía de Luis Suárez leva por título “Morta a escola… morta a aldea”, e reflicte nunha dura imaxe o abandono dos colexios nas pequenas aldeas a través da visión dun encerado e un vello pupitre nunha aula que se atopa en moi mal estado.
Esta fotografía foi elixida entre as cen máis valoradas da web, e a dotación económica do premio é de 1.500 euros. Inscríbese na categoría de “denuncia”, unha das catro nas que se pode participar neste certame, no que o gañador foi Jordi Juliá Corominas, da Universitat Oberta de Catalunya.
A entrega dos premios celebrarase no transcurso da Xunta Xeral de Accionistas de Universia que terá lugar na Universidade de Murcia os días 3 e 4 de maio.
Máis información: http://www.fototalentos.fundacionbancosantander.com/
 

Normal acolle na primeira quincena de maio o Ciclo de Música
Contemporánea, coa colaboración de alumnado do Conservatorio

A Coruña, 2 de maio de 2012.- O Espazo de Intervención Cultura da Universidade da Coruña, Normal, acollerá na primeira quincena de maio o Ciclo de Música Contemporánea denominado Espazo IXOr, dirixido por Pablo Coello con alumnado do Conservatorio Superior de Música da Coruña. Trátase dunha oportunidade excepcional para achegarse, en catro sesións diferentes, a repertorios musicais nada habituais entre nós, como pode ser a música de Xenakis, Stockhausen, Cage, Glass ou Gubaidulina, entre outros músicos menos coñecidos. Con este ciclo, Normal prosegue o seu achegamento didáctico e experimental a expresións da vangarda musical contemporánea.
O ciclo comezará o xoves 3 de maio ás 20.00 horas co concerto inaugural, no que se propón unha viaxe ao mundo interior da muller a través da natureza e do son, con obras de Philip Glass, Ben Hackbarth e Iannis Xenakis. O venres, 7 de maio ás 20.00 horas presentarase o segundo concerto, cun programa interpretado pola Aula de Saxofón do Conservatorio Superior de Música da Coruña e convidados.
O programa retomarase o xoves, 10 de maio ás 20:00 horas cun concerto dedicado ás músicas contemporáneas, con especial protagonismo para o Silenzio de Sofia Gubaidulina. Finalmente, o ciclo pecharase o luns, 14 de maio 20:00 horas cun concerto no que o Ensemble IXORafonda afondará na música do artista multimedia francés Pierre Jodlowski, entre outros compositores.
Máis información: http://istoenormal.org/gl/novas/espazo-ixor

A Vicerreitoría do Campus de Ferrol organiza unha plantación para mellorar o xardín de Esteiro

A Coruña, 30 de abril de 2012.- A Vicerreitoría do Campus de Ferrol e Responsabilidade Social organiza o vindeiro xoves, 3 de maio, unha plantación de novas especies arbóreas, coa fin de mellorar o xardín universitario de Esteiro.
A plantación, á que están convidados os membros da comunidade universitaria que queiran sumarse, comezará ás 12:30 horas na zona existente entre a Escola Universitaria de Deseño Industrial e a Facultade de Ciencias do Traballo.
En total serán 17 as especies que se plantarán, entre as que figuran a camelia, o toxo, o laranxo, o castiñeiro, a nogueira, etc.
 

Xornada técnica na Facultade de Informática organizada pola Rede
Galega de Recursos Lingüísticos para unha Sociedade do Coñecemento

A Coruña, 30 de abril de 2012.- O Salón de Graos da Facultade de Informática da Universidade da Coruña acollerá o mércores, 2 de maio, o seminario titulado “Recuperación da Información e PLN”, organizado pola rede RELISCO (Rede Galega de Recursos Lingüísticos para unha Sociedade do Coñecemento). A sesión da mañá comezará ás 10:30 horas coa conferencia de Gaël Dias, da University of Caen Basse-Normandi. A continuación, ás 11.30 horas, intervirá Luis Pérez Freire, de Gradiant, e a sesión pecharase co relatorio de Daniel Fernández González, do Grupo COLE da Universidade de Vigo.
A sesión da tarde comezará ás 16:00 horas coa intervención de Milagros Fernández Gavilanes, do Grupo COLE da Universidade de Vigo, e continuará co seu compañeiro neste grupo Adrián Blasco González. Finalmente, pechará a xornada Jesús Vilares Ferro, do Grupo LYS da Universidade da Coruña.

Máis información en http://relisco.grupolys.org/noticias

Entrega dos Premios Edificación 2012 a alumnos da Escola Universitaria de Arquitectura Técnica

A Coruña, 30 de abril de 2012.- O Salón de Actos da Escola Universitaria de Arquitectura Técnica da Universidade da Coruña (Aparelladores) acollerá o xoves 3 de maio a exposición e entrega de Premios Edificación 2012, que este ano celebra a súa cuarta edición baixo o lema “Construíndo un mundo sustentable”. Estes premios están organizados pola empresa BASF Construction Chemicals España, S.L. e a Asociación CLUB DIR como forma de impulsar o achegamento das novas tecnoloxías ao mundo académico, que no caso da Escola de Arquitectura Técnica da Coruña van xa pola cuarta edición. O proxecto recoñece o traballo dos alumnos dos últimos cursos na realización de traballos de materias vinculadas á aplicación das novas tecnoloxías químicas para a construción.
A sesión comezará ás 12.30 horas coa visita á exposición dos traballos clasificados e ás 12.40 horas celebrarase a apertura do acto de entrega dos premios, presidido polo vicerreitor de Títulos, Calidade e Novas Tecnoloxías, Julio Abalde. Intervirán, ademais, o tenente de alcalde de Medio Ambiente, Infraestruturas e Territorio do Concello da Coruña, Martín Fernández Prado; o director xeral do Instituto Galego de Vivenda e Solo, Antonio José Boné Pina, o director da Escola, Pedro Fernando Nogueira; e representantes das entidades promotoras, Eloy Urbón (presidente da Asociación Club DIR) e Eduardo Brandao, director de BASF Construction Chemicals España, S.L.

A Deputación de Pontevedra premia unha investigación dunha titulada en Filoloxía Hispánica da Universidade da Coruña

A Coruña, 30 de abril de 2012.- A Deputación de Pontevedra vén de galardoar a Paula Martínez García, licenciada en Filoloxía Hispánica o pasado curso na Universidade da Coruña, por un traballo sobre Literatura Medieval titulado "Alegradvos amadores: vida y obra de un poeta singular del siglo XV llamado Sarnés".
O galardón, concedido na categoría de Novos Investigadores, enmarcado nos Premios Provinciais á Investigación, ten como obxectivo recoñecer o labor dos novos especialistas en diversas disciplinas e a calidade e aportación á sociedade das súas investigacións. Este premio ten tamén as categorías de Humanidades e Ciencias Sociais e Tecnoloxía, ademais do Premio Carmela Arias y Díaz de Rábago. A dotación total destes galardóns, un total de oito, foi de 19.000 euros.

A Universidade da Coruña instala as primeiras prazas de recarga para vehículos eléctricos nos campus da Zapateira e Ferrol

A Coruña, 27 de abril de 2012.- A Universidade da Coruña, en colaboración coa empresa Auteco Seguridad, acaba de poñer en marcha dúas prazas verdes, unha no campus da Zapateira e a outra no campus de Ferrol.
Estas prazas verdes son puntos de recarga para todo tipo de vehículos eléctricos e utilízanse enchufando o vehículo ao cargador como calquera equipo ou electrodoméstico. O tempo que tarda en cargarse depende do modelo do vehículo, pero oscila entre as tres e catro horas. Están instaladas no primeiro andar do aparcamento da Facultade de Ciencias e no aparcamento da Escola Universitaria Politécnica, en Serantes. As dúas prazas están pintadas de verde no chan e sinalizadas con carteis indicadores.
 

A Coruña, 27 de abril de 2012.- Dúas estudantes de doutoramento da Facultade de Informática da Universidade da Coruña, Sabela Ramos Garea e Ana María Freire Veiga, foron premiadas coa Google Anita Borg Scholarship nas categorías de “Scholarship” (con bolsa) e “Finalist” (finalista), respectivamente, na sección de Europa, Medio Oriente e África (www.google.com/anitaborg/emea/winners.html). Esta bolsa pretende facer máis visible o papel das mulleres nos eidos da computación e a tecnoloxía, impulsándoas a adoptar un papel activo e de liderado neste tipo de disciplinas, onde adoitan ser unha minoría. Por iso esta convocatoria ía dirixida a estudantes de carreiras universitarias, mestrados ou doutoramentos, nun campo relacionado coas Tecnoloxías da Información (http://www.google.com/anitaborg/emea/index.html). A adxudicación deste galardón fíxose en base ó perfil académico das aspirantes, á súa experiencia en liderado de actividades e á súa paixón pola Informática.
As dúas estudantes galegas asistirán en xuño á sede europea de Google en Zúrich (Suíza). Alí terá lugar un encontro co resto das galardoadas, en que todas terán a oportunidade de coñecer esta gran empresa e intercambiar coñecementos en varias sesións de traballo.
Sabela Ramos Garea, titulada en Enxeñaría Informática, desenvolve na actualidade a súa tese de doutoramento no Grupo de Arquitectura de Computadores da UDC e é profesora axudante na área de Arquitectura de Computadores na Facultade de Informática. Sabela Ramos xa obtivera o Premio Extraordinario Nacional na súa promoción.
Ana María Freire Veiga, tamén enxeñeira informática, está a realizar a súa tese de doutoramento no grupo de Enxeñaría Telemática da UDC, dentro do programa de Formación de Persoal Investigador (FPI) do Ministerio de Economía e Competitividade
 

A Universidade da Coruña financiará aos grupos de investigación segundo unha valoración externa

• O orzamento para 2012 é de 123,3 millóns de euros, o que supón unha caída do 4,9% con respecto ao ano pasado
• A Universidade mantén as bolsas propias aos estudantes e incentiva a internacionalización
• O orzamento presentado hoxe en Consello de Goberno está pendente de aprobación do Consello Social para que entre en vigor

A Coruña, 26 de abril de 2012.- O reitor, Xosé Luís Armesto, e a vicerreitora de Planificación Económica e Infraestruturas, Amalia Blanco, informaron esta mañá en Consello de Goberno das contas da Universidade da Coruña para este ano. Posteriormente, dirixíronse aos medios de comunicación reunidos na Sala de Prensa para explicarlles os detalles dos orzamentos.
A Universidade da Coruña contará para este ano con 123,3 millóns de euros, e con 6,3 millóns de euros menos que en 2011, o que vén sendo unha redución porcentual do 4,9%. Esta redución non reflicte a sostida baixada no financiamento público, xa que ésta vese paliada en parte recorrendo a fondos propios da Universidade da Coruña, un total de 4 millóns de remanente non afectado procedente da liquidación de 2010, ao que hai que engadir 3 millóns resultantes dunha reclamación histórica de IVE que se ingresaron en decembro do ano pasado. Esta cantidade adicional é o froito dunha planificación económica rigorosa e dunha política de aforro e contención do gasto desenvolvida na Universidade da Coruña desde hai xa varios exercicios económicos. Nas contas deste ano mantense o patrocinio do Banco Santander por un importe de 650.000 euros.
Neste curso produciuse unha redución no capítulo de taxas de matrículas, a pesar da boa evolución do número de alumnos. Isto débese aos cambios derivados da transformación dos títulos no proceso de implantación do Espazo Europeo de Educación Superior, que reduce os ingresos por materias dos planos antigos non impartidas e con dereito a exame. O ingreso por taxas de matrícula na Universidade da Coruña supón unha porcentaxe no orzamento inferior ao 11%. A preguntas dos xornalistas sobre as taxas universitarias, o reitor manifestouse en contra da suba porque supón unha carga para as familias, postura que, lembrou Armesto, mantén a Universidade da Coruña desde o ano 2008 en que se aprobou en Claustro un documento dos estudantes en contra do aumento do prezo das matrículas. O reitor adiantou a previsión da convocatoria dun novo Claustro a mediados do maio para posicionarse sobre este e outros temas de actualidade universitaria. Así mesmo, Armesto contestou aos xornalistas que se interesaron por saber se houbera algunha comunicación oficial coa Xunta sobre este tema, que está previsto unha reunión dos tres reitores co conselleiro de Educación para o vindeiro día 2 de maio.
Finalmente, o reitor da Universidade da Coruña aludiu ao documento publicado no Diario Oficial da Unión Europea o pasado 18 de abril no que se recomenda aos estados membros que non suban as taxas universitarias precisamente para paliar as desigualdades sociais que están a medrar na actualidade.

Avaliación externa da investigación
Unha das novidades que se presentan neste documento económico é a forma de financiamento para os grupos de investigación que se outorgará segundo a valoración da Agencia Nacional de Evaluación y Prospectiva, ANEP, dependente do Ministerio de Economía e Competitividad; o financiamento terá carácter plurianual (para tres anos) coa fin de que os investigadores poidan planificarse máis eficazmente. Outro dos puntos que destacaron o reitor e a vicerreitora no seu informe é o tratamento privilexiado que se lle dá ás axudas aos estudantes co mantemento das partidas destinadas ás bolsas propias da Universidade, tanto na súa contía como no seu número. Destaca así mesmo, a aposta do equipo do reitor pola internacionalización cun apoio económico para establecer redes de colaboración, de investigación ou de docencia, con universidades doutros países.
A Universidade da Coruña destinará unha partida significativa, 715.000 euros, para obras de reforma e adaptación dos centros ao Espazo Europeo de Educación Superior, así como para facilitar a accesibilidade ás persoas con mobilidade reducida. Sen embargo, o investimento en obra nova queda paralizado á espera dunha mellor conxuntura económica.
Os datos constatan, segundo aseguraron o reitor e a vicerreitora, o enorme esforzo interno que se está a facer na Universidade da Coruña con axustes complexos que tratan de minorar a repercusión nos obxectivos de calidade do ensino e da investigación. Así, para este ano conxélase o gasto de persoal e segue a reducirse o gasto corrente que acumula unha baixada dun 20% desde 2009.
O orzamento informado esta mañá en sesión de Consello de Goberno terá que ser aprobado polo Consello Social para que entre en vigor. Na sesión de hoxe aprobáronse outros puntos da orde do día como os calendarios académicos para o próximo curso. Deste xeito, os estudantes de grao e mestrado comezarán as clases o 10 de setembro e finalizarán o 16 de maio de 2013. Os exames do primeiro cuadrimestre serán entre o 8 e o 25 de xaneiro. Os exames do segundo cuadrimestre e das materias anuais serán entre o 20 de maio e o 7 de xuño, mentres que a segunda oportunidade (a antiga convocatoria de setembro) será entre o 1 e o 19 de xullo.
Os estudantes que sigan cursos non adaptados ao Espazo Europeo de Educación Superior comezarán as clases o 24 de setembro e as finalizarán o 31 de maio. Os exames do primeiro cuadrimestre serán entre o 21 de xaneiro e o 8 de febreiro; os do segundo cuadrimestre e das materias anuais irán do 3 ao 21 de xuño. Finalmente, a convocatoria de setembro será do 2 ao 13.
 

O reitor presidirá o 27 de abril o acto de homenaxe ao profesor e investigador Víctor M. Gulías que se celebrará na Facultade de Informática

A Coruña, 25 de abril de 2012.- A Facultade de Informática da Coruña celebrará un acto de homenaxe ao profesor e investigador falecido Víctor M. Gulías Fernández, que terá lugar o próximo venres 27 de abril de 2012 ás 19:00 horas no salón de actos deste centro.
A homenaxe, que será presidida polo reitor da Universidade da Coruña, Xosé Luís Armesto Barbeito, contará tamén coa presenza de membros das distintas universidades, centros de investigación e empresas do sector das TIC coas que Víctor Gulías mantiña relación, ademais dun bo número de alumnos e ex alumnos seus.

O reitor asina dous convenios para prácticas de alumnos de Turismo no concello de Monforte

A Coruña, 25 de abril de 2012.- O reitor da Universidade da Coruña, Xosé Luís Armesto, e o alcalde do Concello de Monforte de Lemos, Severino Rodríguez Díaz, asinaron esta mañá dous convenios marco de colaboración para a realización de prácticas de alumnos de Turismo en empresas ou institucións monfortinas adheridas a este acordo.
Nun caso, trátase de prácticas voluntarias de alumnos que queiran completar o seu curriculum profesional, neste caso as prácticas terán un carácter extracurricular ao non estar incluídas dentro dos planos de estudos das súas titulacións. Poderán durar entre un e cinco meses cun máximo de cinco horas diarias para poder compatibilizar o traballo co estudo.
No outro caso, son prácticas externas curriculares, é dicir, incluídas dentro do plano de estudos de Grao e Mestrado. A duración das mesmas irá en función das horas estipuladas nos planos de estudo.
O número de alumnos que se poderán beneficiar destes acordos depende tamén da demanda por parte das empresas e institucións do concello de Monforte que se adhiran ao convenio.
 

O reitor explicará os orzamentos de 2012 nunha rolda de prensa tras o Consello de Goberno de mañá

A Coruña, 25 de abril de 2012.- O Consello de Goberno de mañá, xoves, 26 de abril levará entre os seus puntos da orde do día o informe do anteproxecto de orzamento e Plano operativo anual 2012, nunha sesión que comezará na Reitoría ás 9:30 horas en primeira convocatoria e media hora máis tarde en segunda. Os orzamentos da Universidade da Coruña non entrarán en vigor ata que sexan aprobados polo Consello Social.
Ás 13:00 horas o reitor, Xosé Luís Armesto, e a vicerreitora de Planificación Económica e Infraestruturas, Amalia Blanco, explicarán en rolda de prensa na Sala de Prensa da Reitoría, os detalles dos orzamentos previstos para este ano. Como se recordará, a Universidade da Coruña estaba ata o de agora cos orzamentos prorrogados de 2011 logo do cambio no equipo reitoral e da súa toma de posesión a mediados do mes de xaneiro.
A sesión de mañá do Consello de Goberno tratará outros temas como os calendarios académicos para o próximo curso.